समयमा मजदूरी गरेको पैसा नदिँदा मालिकको हत्या, तीन जना पक्राउ

समयमा मजदूरी गरेको पैसा नदिँदा मालिकको हत्या, तीन जना पक्राउ
मोरङको लेटाङ नगरपालिका–३ का २२ वर्षीय रोमन राईको हत्यामा संलग्न भएको आरोपमा थप एक जना पक्राउ परेका छन् । शनिबार साँझ मोरङ प्रहरीले १९ वर्षीय भुपाल लिम्बूलाई पक्राउ गरेको हो ।

यसअघि प्रहरीले लेटाङ–३ का २१ वर्षीय सुशील दर्जी नेपाली र २० वर्षीय दिलबहादुर लिम्बूलाई पक्राउ गरेको थियो । शनिबार बिहान नै पक्राउ परेका उनीहरूको बयानको आधारमा प्रहरीले भुपाललाई पक्राउ गरिएको मोरङ प्रहरी प्रवक्ता डिएसपी मानबहादुर राईले जानकारी दिए ।

‘घटनाको अनुसन्धान गर्नेक्रममा भुपालको संलग्नता देखियो,’ उनले केटिएम दैनिकसँग भने, ‘हत्या गर्न जाँदा उनी पनि थिए भनेर बयानका क्रममा खुल्यो, यसैले उनलाई नियन्त्रणमा लिएका हौँ । यस विषयमा थप अनुसन्धान भइरहेको छ ।’ बयानका क्रममा तीनै जनाले समयमा मजदूरी गरेको पैसा नदिँदा मालिकको हत्या गरेको स्वीकारेको डिएसपी राईले बताए ।

उक्त घटनाका आरोपी र मृतक साथी–साथी रहेको खुलेको छ । डेढ वर्षअगाडि काम गरेको पैसा नदिएपछि मिलेर आफ्नै साथीको हत्या भएको हो । हत्या आरोपी दर्जी र लिम्बूलाई इलाका प्रहरी कार्यालय लेटाङ्गले शनिबार बिहानको राति २ बजेतिर पक्राउ गरेको थियो ।

मृतक राईले ट्र्याक्टर भाडामा लिएर दर्जी र लिम्बूलाई गिट्टी र बालुवा ओसार-पसारको काम गराउने गरेका थिए । लामो समयदेखि मजदूरी गरेको रकम नदिएका कारण शुक्रबार राति उनीहरू आफूहरूले काम गरेको पैसा माग्न रोमनको कोठा पुगेका थिए । डेढ वर्षअगाडि काम गरेको पैसा माग्ने क्रममा आपसी विवाद सिर्जना भएको थियो । जसक्रममा दर्जीले राईमाथि धारिलो छुरा प्रहार गरेका थिए । पेटमा छुरा प्रहार गरिएपछि राई गम्भीर घाइते बनेका थिए ।

उपचारका लागि विराटनगरको विराट नर्सिङ होम एवं विराटनगर अस्पताल ल्याउँदै गर्दा उनको बाटैमा राति १०ः३० बजेतिर मृत्यु भएको थियो । यता, राईलाई गम्भीर घाइते बनाएपछि दर्जी र लिम्बू फरार भएका थिए ।

राईले भाडामा लिएको ट्र्याक्टरमा ढुङ्गा, गिट्टीको माग पुर्‍याउने काम गर्थे । ‘त्यही काम गरेका पैसा माग्न जाँदा विवाद भएको र त्यसैक्रममा रोमनमाथि छुरा प्रहार भएको देखिएको छ’, डिएसपी राईले भने, ‘कति पैसा लिनुपर्ने भएकोले झगडा भएको हो, त्योबारे खुलेको छैन । अहिले अनुसन्धान भइरहेको छ ।’

रोमनलाई आक्रमण गर्नुअगाडि दर्जी र लिम्बूले मदिरा सेवन पनि गरेको खुलेको छ । प्रहरीका अनुसार हत्या गरिएका राई ट्र्याक्टर भाडा लिएर काम गर्न छोडेपछि लेटाङमै पुलहाउस सञ्चालन गरेर बस्थे । पक्राउ परेका तीन जनालाई इप्रका लेटाङले आइतबार ‘कर्तब्य ज्यान’ मुद्दामा म्याद थप गरी अनुसन्धान गरिरहेको छ ।