५ जेठ, पोखरा । छोरा बुहारीमा कोरोना संक्रमण पुष्टि भएको भोलिपल्ट ९३ वर्षीया आमाको मृत्यु भयो । २ वर्षदेखि दीर्घ रोगले थलिएकी आमाको मृत्युपछि अन्त्येष्टिमा आफन्तहरु बेलैमा आएनन् । केही मनकारी छिमेकीले घाटमा शव जलाउने तयारी गर्दा अर्को गाउँका स्थानीयले अवरोध गरे । दिनभर तनाव भयो र अन्ततः आफ्नै घर अगाडि खाल्डो खनेर पुर्नुपर्ने स्थिति सिर्जना भयो ।
यो घटना हो, स्याङ्जा आँधिखोला गाउँपालिका वडा नम्बर २ चिलाउनेबास पोखराचौरकोे । सोमबार गाउँका तीन जनामा कोरोना संक्रमण देखिएको थियो । संक्रमित हुनेमा एक परिवारका श्रीमान श्रीमती र अर्का एक थिए ।
संक्रमित श्रीमान श्रीमतीकी ९३ वर्षीया आमाको मंगलबार निधन भयो, जो दिर्घरोगी थिइन् । आफूहरुमा संक्रमण देखिएकै कारण आमाको शव व्यवस्थापनमै अवरोध सिर्जना भएपछि मातृ शोकमा परेका छोराबुहारी विक्षिप्त बनेका छन् ।