काठमाडौं । अन्तर्राष्ट्रिय क्रिकेट काउन्सिल (आइसिसी)का अनुसार नेपाली लेग स्पिनर सन्दीप लामिछाने सन् २०१९ मा सर्वाधिक विकेट लिने स्पिनर बनेका छन् । सन् २०१९ को जनवरीदेखि मे १ सम्म सन्दीपले २७ विकेट लिँदै पाकिस्तानका पूर्वकप्तान शाहिद अफ्रिदी, अफ्गानिस्तानका राशिद खान, बङ्गलादेशका सकिब अल हसनलाई पछि पार्दै यो किृतिमानी कायम गरेका हुन् । सन्दीपले जनवरीयता खेलेका सबै खेलमा गरेर २७ विकेट लिएका छन् । बङ्गलादेश प्रिमियर लिगमा सिल्हेट सिक्सर्सबाट खेलेको खेलमा सन्दीपले चार विकेट लिएका थिए । त्यस्तै यूएईसँगको तीन टि–२० सिरिजमा उनी पाँच विकेट लिन सफल भएका थिए ।युएईसँगको सिरिजपछि पुनः अष्ट्रेलियाको बिग ब्यास लिग खेल्न गएका सन्दीपले ४ विकेट लिएका थिए । पाकिस्तान सुपर लिगमा सन्दीपले ११ विकेट लिए । जारी आइपिएलमा सुरुवाती दुई खेलमा तीन विकेट लिएपछि सन्दीपले २७ विकेट पुगाउदै यो कृतिमानी कायम गरेको हो । सन् २०१९ मा अफ्रिदीले २६, राशिद २५ र सकिबले २४ विकेट लिएका छन् । सन्दीप अहिले दिल्ली क्यापिटल्सबाट इन्डियन प्रिमियर लिग (आइपिएल) खेलिरहेका छन् । उनले सोमबार रातिको लिगअन्तर्गत १३औँ खेलमा किङ्ग्स इलेभेन पञ्जाबसँग ४ ओभरमा २७ रन खर्चेर दुई विकेट लिएका थिए ।
संगै जन्मेका तिम्ल्याहा दिदी-भाई एसईई दिदै, ३ जनाको एउटै जनममिति भेट्दा केन्द्रले सोधपुछ
लमजुङ — लमजुङको बेंसीसहर–२, भकुन्डेस्थित बालकल्याण मावि केन्द्रका परीक्षार्थीको विवरण रुजु गर्ने क्रममा शनिबार तीन जनाको जन्ममिति एउटै भेटियो । थर पनि एउटै । नाम गंगा, जमुना र सागर ।‘कौतूहल भएपछि अरूलाई बुझ्यौं, उनीहरूलाई पनि सोधपुछ गर्यौं,’ केन्द्राध्यक्ष तीर्थ नेउपानेले भने, ‘उनीहरू तिम्ल्याहा रहेछन्।’ चैत १० बाट भइरहेको एसईईमा एउटै केन्द्रमा तिम्ल्याहा विद्यार्थी रहेको त्यसअघिसम्म न केन्द्राध्यक्षलाई थाहा थियो, न निरीक्षक, न त परीक्षार्थीलाई । उनीहरूकै साथीबाहेकले चाल पाएनन् । मिल्दोजुल्दो अनुहार भए पनि एउटै कोठामा नपरेकाले तिम्ल्याहा हुन् भनेर कसैले अडकल गरेको थिएन ।गंगा, जमुना र सागर बेंसीसहर–३ बाहुनबेंसीको यशोब्रह्म माविका विद्यार्थी हुन् । उनीहरूले कक्षा १ देखि नै सँगै पढेका हुन् । उनीहरूले ५ र ६ कक्षा नजिकैको लालीगुराँस आवासीय स्कुलमा पढेका थिए । उक्त स्कुल बन्द भएपछि उनीहरूले सामुदायिक विद्यालय रोजे । तिम्ल्याहा गंगा, जमुना र सागर २०६१ असार ३ मा जन्मिएका हुन् । उनीहरू भोजकुमार र सुशीला श्रेष्ठका छोराछोरी हुन् । राइनास–७ गरमबेंसी घर भएका उनीहरू दोस्रो सन्तान हुने बेला चितवनको भरतपुरमा बस्दै आएका थिए । ठूली छोरी जन्मेको तीन वर्षपछि दोस्रो सन्तानको प्रतीक्षा थियो । तिम्ल्याहा जन्मँदा श्रेष्ठ दम्पती छक्क परेका थिए । सुशीलाले अस्पतालमा ‘नर्मल डेलिभरी’ मै तिम्ल्याहा जन्माइकी थिइन् । खुसीसँगै धेरैवटा सन्तान हुर्काउनुपर्ने दायित्व थपिएपछि उनीहरू पुर्ख्यौली घर फर्किएका थिए ।लमजुङ विद्युत् उपभोक्ता संस्थामा प्राविधिकको काम थालेका भोजकुमारको २०६५ फागुन ११ मा पोलमा विद्युत् मर्मतका क्रममा करेन्ट लागेर निधन भयो । घटनापछि संस्थाले सुशीलालाई कार्यालयमा जागिर दियो र परिवारका पाँचै जनाको नाममा जनही १/१ लाख बैंक खातामा राखिदियो । आफूले जागिर खानुपर्ने भएपछि उनी ४ वर्षका तिम्ल्याहा छोराछोरी र ७ वर्षीया ठूलीछोरी लिएर बेंसीसहर–३, रानीकुवा आएकी हुन् । सुशीला २०६६ वैशाखदेखि छोराछोरीसहित रानीकुवामा डेरा गरेर बसेकी छन् ।सुशीलाको मासिक तलब १८ हजार रुपैयाँ छ । मासिक ४ हजार रुपैयाँ घरभाडा तिर्नुपर्छ । ठूली छोरी बेंसीसहरको जनविकास माविमा कक्षा १२ मा पढछिन् । ‘मेरो तलब घरभाडा तिर्न, खानलाउन, बच्चाको फी तिर्नमै ठिक्क छ,’ सुशीला भनिन्, ‘बचत गर्न सकिएन । छोराछोरीले राम्रो पढ्न खोजे खर्च बन्दोबस्त गर्नसक्ने क्षमता छैन ।’
Views: 0