पनौती, काभ्रे – श्रावण २६ पनौतीको हरियो डाँडामाथि, सुनौलो सूर्यकिरणसँगै आज एउटा इतिहास झल्किएको छ । कालाग्नि रुद्रपीठ लड्केश्वर धाम – जहाँ श्रद्धा, संस्कार र राष्ट्रप्रेम एउटै आसनमा बस्छन् – आज फेरि एक नयाँ गौरवको साक्षी बन्यो ।
विश्वकै अग्लो शिव त्रिशूल निर्माण, ७७ जिल्लाको रथयात्रा र राष्ट्रिय कोटिहोमको भव्यता पछि, आज धामको आकाशमा ६.५ केजी शुद्ध चाँदीको “निशानी”ले आफ्नो अस्तित्व फिजायो । यो निशानी केवल चाँदीको टुक्रा होइन, यो राष्ट्रको आत्मा र जनताको एकताको दर्पण हो ।
संस्कृति, पर्यटन तथा नागरिक उड्डयन मन्त्री माननीय बद्री पाण्डे र श्री १००८ स्वामी रमणानन्द महाराजको संयुक्त करकमलले निशानीको आवरण हटाउँदा उपस्थित जनसमूहको हृदयमा भक्ति र गर्वको तरङ्ग एकसाथ उम्लियो ।
कार्यक्रममा प्रा.डा. भवानी खतिवडा, भारत नागेश्वर ज्योतिर्लिंगका अर्चक दर्शन नागनाथ, ज्यो. लक्ष्मण पन्थी, राजनीतिज्ञ मधु आचार्य, पनौती नगरपालिकाका मेयर रामसरण भण्डारी लगायतका दर्जनौं सम्मानित व्यक्तिहरू उपस्थित थिए । पीठाधीश मुकुन्द शर्मा हुमागाईले अब यो निशानी ‘राष्ट्र र राष्ट्रियता प्रति श्रद्धा एवं संकल्प यात्रा’का साथ ७७ जिल्लामा लैजाने घोषणा गर्दा, जनसमुदायको उत्साहले आकाश छोयो ।
श्री १००८ स्वामी रमणानन्द महाराजले आफ्नो आशिर्वचनमा स्पष्ट शब्दमा भने, “राजा, नेता, जनता- सबै मिलेर राष्ट्रदेवसँग क्षमा मागौं, अनि एक भएर देशलाई समृद्ध बनाऔं ।” मन्त्री पाण्डेले लड्केश्वर धामलाई राष्ट्रिय धार्मिक–पर्यटकीय गन्तव्य सूचीमा राख्ने र पशुपतिनाथ दर्शनसँगै यहाँको पाशुपतास्त्र दर्शन गर्न सहज वातावरण बनाउने घोषणा गरे ।
आजको दिन केवल एक अनावरण मात्र थिएन, यो राष्ट्र र श्रद्धाको हातेमालो थियो । र, यो हातेमालो अब ७७ जिल्लामा पुगेर प्रत्येक नेपालीको मुटुमा लड्केश्वरको आशीर्वाद भरिदिनेछ ।
Views: 4